Siidaskuvla lea báiki buohkaide oahppat siiddaid birra. Siida lea historjjálaččat leamašan sámi servodaga dábálaš hálddašanmálle. Siidaskuvlla ulbmilin lea siidaortnega doaibmamálliid guorahallan ja ođasmahttin. Dát sámedutkiid, -dáiddáriid ja eará servodatberošteaddjiid oktasaš prošeakta geahččala guorahallat ja iskat mo siida lea doaibman ja makkár oasit das ain doibmet min servodagas. Siidaskuvlla deháleamos ulbmilin lea čielggadit siidaortnega mearkkašumi ja vejolašvuođaid otnábeaivve dárbbuid várás. 

Prošeavtta dárkilut ulbmilat leat:

• Suokkardit mo siidda doahpagiid ja vieruid sáhtášii váldit atnui otnábeaivve organisašuvnnain ja mearrádusaid dahkamis, ja dan lassin,
• Kártet konkrehta ovdamearkkaid dan birra, mat siidaortnega doaibmamálliin ja -geavadiin leat ain anus (ovdamearkka dihtii boazodoalus ja nuortalaččaid giličoahkkimis),
• Hukset saji, gos sáhttá iskkadit ođđa vejolašvuođaid searvvušvuđot oassálasttimii ja servodathuksemii,
• Ovddidit sohkabuolvvaid gaskasaš dieđu ja dáidduid sirdima ja oahppama,
• Ráhkadit saji gos sáhttá gieđahallat ja burgit servodaga siskkáldas veahkaválddi hámiid (fysalaš ja vuoiŋŋalaš) maiddái nu, ahte láhččojuvvojit oassálasttinvejolašvuođat maiddái queer-sámiide,
• Ovddidit ođđalágan geavatlaš ja oassálasti dieđubuvttadanmetodaid, ja
• Váldit atnui sámi dáhpelága.

Siidaskuvla ollašuhtto guovtti jagi prošeaktan, masa gullojit sihke dutkan- ja dáiddaoasit. Prošeavtta ruhtada Kone Foanda. Guovddáš doaimmat leat arkiivabarggut, jearahallamat (jietna ja video), čállosat, siiddaid guovlluide oahpášmuvvan, bargobájit ja deaivvadeamit. Bargobájiid ulbmilin lea konkretiseret ja figgat ollašuhttit geavatlaččat siidaortnega vuođđoulbmiliid ja doaibmamálliid. Ulbmilin lea juohkit ja sirdit viidásut sámi kulturduovdagiidda, luondduoktavuhtii ja árbevirolaš ealáhusaide gullevaš dieđuid.

Guovtti siidaskuvlla bargobájis johtit siiddaid guovlluin ja oahpásmuvvat guovlluid árbevirolaš eanangeavahanvugiide ja muitalusaide, ja daid bokte eatnamiid ja luonddugáhppalagaid oktavuođaide. Oahpaheaddjin ja láidesteaddjin leat olbmot geat dovdet guovlluid. Dáinna lágiin ráhkadit árbevirolaš dieđu sirdimii vejolašvuođaid ja seammás vurket daid dieđuid. Ovdal siiddaid guovlluin johtima čielggadit árat girjjálašvuođa ja jearahallamiid vuođul siiddaid rájáid, dehálaš guovlluid ja guovddáš báikkiid ja gávdnat rivttes ofelaččaid.

Siidaskuvlla bohtosat čohkkejuvvojit dáid siidduide, mat leat oaivvilduvvon diehtovuođđun sámi servodaga ja sapmelaččaid atnui.

Mii leat álggahan maiddái blogga #DatÁlgáMis masa buohkat leat buresboahtin čállit ja juohkit jurdagiid das, mo sámi servodathuksen álgá mis.