Giellajoga jurddabádji
Čoahkkaneimmet smávva joavkkuin 27.-29.8.25 Giellájohgáddái háleštallat siidavuogádaga boktima geavatlaš beliin Káre Jovnna Signe Finn Arne (Bieski-Selfors) čielggadeami vuođul. Finn Arne lea suokkardallan Siidaskuvla-prošeavtta joatkkadoaibman siidavuogádaga ja siiddastallanvieruid boktima vejolašvuođaid ja hástalusaid otná sámeservodagas.
Ságastallamiin vihkkedalaimet leatgo sámeservodagas návccat dahje dárbu ásahit siidavuogádaga. Leimmet ovttaoaivilis das, ahte dál orru dárbu ealáskahttit siiddaid ja siidavuogáda sámi servodatásahussan, man vuođđun leat árbevirolaš sámi árvvut, muhto seammas maiddái heivehit siidavuogádaga otnábeaivái ja diliide, mas mii dál eallit. Siiddaid boktima sáhtášii álggahit nu, ahte vuos ásahuvvojit ofelašsiiddat báikkiide, gos daidda lea beroštupmi ja dárbu. Siidavuogádaga boktin lihkostuvvá, jus mii buohkat bargat ovttasráđiid ja soabalaččat dan ovdii.
Evttohus Sámiráđđái 2026 Sámekonferánssa oktan váldofáddán.
Siida lea sámiid árbevirolaš servodatvuogádat, muhto koloniseren ja stáhtaid assimilašuvdnapolitihkka lea dolvon dan suoivanii ja dahkan dan oaidnemeahttumin sihke sáme- ja váldoservodagain.
Sámedikkiid ásaheami oktavuođas ollugat háliidedje ealáskahttit siidavuogádaga, muhto jurdda ii lean velá doarvái láddan dasa. Loga eambbo ➡️
| Guldal: Yle Sámi iđit – iiđeed – tue’les | https://areena.yle.fi/1-75949999 (42:35 – 52:09) |
| Dološ siidavuogádahkii máhccan veahkehivčče čohkket searaid, oaivvildit Siidaskuvllas (Yle Sápmi) | https://yle.fi/a/74-20180081 |
| Siidavuogádaga boktin dál (Avvir) | Avvir 15.09.2025 |
