Otne lea stuorámus bassi

Beaska Niillas

Beaivi, Áhččámet jorggeta ja ođđa jahkki riegáda. Ođđa áigi álgá ja čuovga fas máhccagoahtá. Čuovga ja eallin.

Dálvejorggáldat – Dálvebeaijorggáldat – Beaivejorggáldat

Mo dal jo gohčodeš de lea erenoamáš beaivi.
Seavdnjadas ii gávdno čuovgga haga.
Iige čuovga gávdno seavdnjadasa haga.

Áiggiid čađa leat eanaš álbmogat ja kultuvrrat atnán dán beaivvi bassin ja mearkkašahttin.
Maiddái sámit. Ja máŋgasat ain atnet dán beaivvi bassin.

Ovdal mii vuoiŋŋasteimmet, jurddašeimmet, máinnasteimmet ja vuollegašvuođain giittiimet beaivvi go addá eallima ja čuovgga.

Muhtumat dahket dan ain.

Dán áigái lea gártan nuppeláhkai.

Olbmot vudjot vieruide mat eai leat heivetuvvon luonddu vuoigŋamii ja dárbbuide.
Lea hušša ja doapman, badjelmearástallan ja amas kaleandarat ja vuordámušat mat stivrejit min láhttemiid. Ii gártta dilli vuoiŋŋastit, gullat luonddu vuoigŋama dahje eallima ja áiggi riegádeami fuomášit.

In leat gal viggamin earáid vieruid cuoigut, ii ge várra buohkaide ba heivešii ge máhccat dahje basutit iežamet beivviid. Muhto vikkan gal fuomášahttit ahte mis leat iežamet vierut ja vejolašvuođat, maiguin ráfálašvuođa, giitevašvuođa ja ráhkisvuođa beassá návddašit.

Lea maiddái sáhka áicamis ja gažadeamis ja nu dasto maid dekoloniseremis.
Manne dahkat dan maid dahkat ja geasa lea ávkin. Badjelmearástallan mii čuovvu nu gohčoduvvon juovlabasiid lea eahpikeahttá ávkin kapitalismii. Iežamet vieruid vajáldahttin dahje hilgun ges lea ávkin daidda geat jo máŋgačuođi jagi leat viggan min hávkadit. Iežamet vieruid čuovvun lea ávkin midjiide.

Bealistan gal joaŧkkán meahccái mannat dán beaivvi. Ja joaŧkkán hilgut skeaŋkkaid oastima go ii máilbmi gierdda dan issoras badjelmearástallama mii dál lea. In láve juovlahearvvaid boltut ja in ge dáhto vieris olbmuid šaddanbeivviid ávvudit.

Baicca leat munjje stuorámus skeaŋkkat ja hearvvat go ain beassat buhtes áimmu vuoigŋat, ain beassat buhtes čázi juhkat, ain beassat boahtteáiggi nieguid niegadit ja ain beassat eadnámet askkis vuoiŋŋastit.

Beaivi, Áhččámet jorggeta ja ođđa jahkki riegáda. Ođđa áigi álgá ja čuovga fas máhccá. Čuovga ja eallin. Otne lea stuorámus bassi.

Ja lea ráfi ja buorre.